Cómo trabayamos en EMTI Fervienza

Soy Tever, gaiteru y maestru de gaita asturiana, y llevo tres proyeutos al empar dende esti añu: tever.es pa la música, labs.tever.es pa la investigación n’informática musical, y EMTI Fervienza —Escuela de Música Tradicional ya Innovación, la mio escuela online de gaita asturiana y tin whistle (la flauta irlandesa mundialmente conocida, tamién parte del programa)— pa l’enseñanza. Les tres facetes convivien na mesma persona —músicu, investigador, docente— y por eso escribo equí sobre la mio escuela, non solo nel so propiu dominiu: lo que faigo enseñando gaita asturiana y tin whistle sal de la mesma cabeza que compon y qu’investiga. Yá conté cómo nació’l nome n’agostu. Agora toca contar cómo trabayamos.

Por qué la diseñé asina

Cuando pensé’l modelu d’EMTI Fervienza, tenía claro lo que nun quería: que’l ritmu del aprendizaxe dependiera de que la mio disponibilidá y la del alumnáu concasaren nel mesmu güecu de la selmana. Nun ye que la clase en direutu nun m’importe —ye que quería sostener el tratu individual d’otra forma, ensin que un desaxuste d’horarios se convirtiera na barrera d’entrada.

El modelu tien cuatro pieces:

• La clase entrégase grabada, non en direutu. Cada persona vela cuando pue, repítela si fai falta, párala pa probar nel punteru —la parte de la gaita asturiana onde se toca la melodía colos dedos— o nel tin whistle enantes de siguir.
• Una plataforma propia comprueba que l’aprendizaxe se ta consiguiendo. Nun ye repasu llibre: el sistema monitoriza en vivo la interpretación mientres toques y mide’l progresu real, non namás que’l videu s’haya reproducío. Enxamás grava audio nin videu del alumnáu: la midición ye nel momentu.
• Les dudes resuélvense con videos míos, grabaos a partir de lo que entruga cada alumnu. Nun ye una respuesta xenérica yá preparada d’enantes: respondo a daqué concreto que daquién entrugó. Y esos videos queden disponibles pa tou l’alumnáu, non namás pa quien entrugó —ye mui probable que la mesma duda la tenga más xente, asina que’l videu acaba siendo útil más allá de la entruga que lu orixinó.
• El primer contautu sí ye en direutu. La evaluación inicial, gratuita, ye la única fase con videollamada real: sirve pa decidir si EMTI Fervienza encaxa, non pa impartir la clase en sí.

Tres pieces propies, un mesmu resultáu

Que yo conoza, dengún otru sitiu onde s’enseña gaita asturiana o tin whistle güei combina estes tres coses al empar, y les tres apunten al mesmu sitiu: qu’l alumnáu toque, non que acumule teoría.

Métodu propiu. Nun adautu un métodu pensáu pa otru instrumentu —construílu pa la gaita asturiana y el tin whistle dende cero, cola mesma lóxica que yá usé dando clases en Proaza y Teverga ente 2017 y 2022 y que dempués crucié con teunoloxía.

Instrumentos fabricaos pola propia escuela. La Xibla —la flauta qu’uso pal aprendizaxe de la gaita asturiana— y el tin whistle qu’uso nes clases fabríquenlos EMTI Fervienza, nel mio propiu taller. Quien entama de cero nun depende d’atopar un instrumentu afayadizu pela so cuenta: la Xibla o el tin whistle van incluyíos na matrícula. Si yá tienes el to propiu instrumentu —tamién si ye gaita asturiana—, trabayamos con él. Yo dispongo y fabrico l’instrumentu pa les nueses clases gracies a la esperiencia acumulada dende’l mio primer taller CHALGA de llutería 3D.

Plataforma propia de siguimientu. La mesma que verifica l’aprendizaxe y sostién les tutories per videu: nun ye un añedíu, ye la columna vertebral de que’l modelu asíncronu funcione ensin perder el tratu individual.

El resultáu concretu ye que l’alumnáu toca acompañáu dende’l principiu: sobre pistes d’acompañamientu que grabo yo, con otros instrumentos yá puestos, cada persona toca la so propia parte enriba. L’oxetivu que buscamos ye poder sentir la esperiencia completa de ser músicu y tocar con otros instrumentos dende’l minutu 1.

Esa combinación —métodu, instrumentu y siguimientu, los tres propios— responde a daqué qu’yá esplicué al repasar l’estáu actual del conservatoriu y les escueles de gaita asturiana: la formación reglada meyoró muncho en dos décades, pero sigue dexando fuera a quien nun tien un conservatoriu nin una escuela de banda cerca, o a quien quier deprender al so ritmu ensin depender d’una plaza.

Ochobre, y la puerta que nun se zarra

El cursu entama n’ochobre de 2026. Pero la matrícula nun zarra esi mes: ta abierta tol añu. Ochobre ye’l puntu de partida del cursu, non una fecha límite pa apuntase —quien llegue en xineru o en xunu entra cola mesma evaluación inicial gratuita y el mesmu modelu, ensin esperar a la siguiente convocatoria. Si quies pedila, escríbeme a hola@emtifervienza.com.

El métodu d’aprendizaxe qu’aplicamos n’EMTI Fervienza ye’l resultáu de los mios cuasi 30 años de trabayu cola gaita asturiana y la música tradicional. Tres tou esti tiempu, creo que lo más importante a la hora de deprender a tocar un instrumentu ye consiguir autonomía: ser a tocar les pieces que conoz ún cuando y onde quiera.