Afinamientu de la gaita asturiana: do, si bemol, re y cómo escoyer

Nun hai una sola gaita asturiana: hai gaites afinaes en distintes tonalidaes, y la que escueyas camuda’l timbre del instrumentu y el repertoriu que vas poder tocar con comodidá. Los afinamientos más estendíos güei son do, si bemol y re. Equí espliquéte qué supón cada ún y cómo escoyer, ensin tecnicismos de más.

Si entá nun tienes claro de qué pieces se compón l’instrumentu, entama por qué ye la gaita asturiana y vuelvi equí: l’afinamientu entiéndese meyor cuando yá sabes qué ye’l punteru.

Qué significa “afinamientu” nuna gaita

L’afinamientu d’una gaita ye la tonalidá base que da’l so punteru, el tubu melódicu. Cuando se diz qu’una gaita ta “en do”, quier dicir que la so nota fundamental ye un do, y que la escala que saques tapando y destapando furacos constrúyese dende ehí.

A diferencia d’un instrumentu d’afinamientu variable, una gaita ta construyida nuna tonalidá fixa: el llargor del tubu y la posición de los furacos determínenla. Nun “xubes” nin “baxes” de tonu a vountá. Por eso un gaiteru que quier tocar en delles tonalidaes suel tener más d’una gaita.

Por qué hai dellos afinamientos

Nun ye capricho nin desorde: ye historia y función.

• Tradición y zona. Distintos talleres y distintes comarques asentaron distintes tonalidaes a lo llargo del tiempu. La variedá ye parte del paisaxe del instrumentu.
• Con quién se toca. Una gaita tien que casar coles voces o los instrumentos que la acompañen. La tonalidá decide si encaxa con un coru, con una banda o con otra gaita.
• Timbre. A igualdá de pieza, una gaita grave suena más escura y rotunda; una más aguda, más brillante y penetrante. La tonalidá ye tamién una decisión de color.

Los afinamientos más usaos

Afinamientu	Color del soníu	Usu típicu	Pa quién
Do	«Centrada» (Do mayor), nin grave nin aguda	La sonoridá habitual n’Asturies; voces y banda	Quien entama
Si bemol	Grave, escuru y caliente	Celebraciones relixoses; bandes escoceses y bagadou bretones	Sobriedá y arcu atlánticu
Re	Más aguda y brillante	Espectáculu; sonoridaes irlandeses	Gaiteros profesionales

Gaita en do

Ye la gaita pela qu’entamar y la sonoridá a la que tamos avezaos n’Asturies. Musicalmente suel dicise que ta «centrada», porque usa la tonalidá de Do mayor: nin demasiao grave nin demasiao aguda, una referencia clara pal oyíu. Casa bien coles voces y con bona parte del repertoriu de banda. Si dudes per ónde entamar, do ye la escoyeta segura.

Gaita en si bemol

Más grave que la de do, con un color más escuru y caliente. N’Asturies úsase sobre too pa les celebraciones relixoses, onde apurre sobriedá. Fuera d’equí ye la tonalidá de referencia del arcu atlánticu: la qu’afinen les bandes de gaites escoceses y los bagadou bretones. Tien presencia ensin estridencia.

Gaita en re

Más aguda que la de do, ye la que se busca pal direuto y l’espectáculu: da más opciones sonores sobre l’escenariu y permite averase a les sonoridaes irlandeses, que viven nesa tonalidá. Ye l’afinamientu que suelen escoyer los gaiteros profesionales. A cambiu, ye menos versátil pa acompañar voces.

Cómo escoyer la tuya

Nun escueyas por moda, escueyi por usu. Entrúgate:

1. ¿Con quién vas tocar? Si vas acompañar a un coru o a otros gaiteros, la tonalidá d’ellos manda. Una banda o grupu asentáu cuasi siempres tien un afinamientu de referencia.
2. ¿Qué repertoriu te tira? Si ye ceremonial y d’acompañamientu, una gaita grave (si bemol) va sonate de maravía. Si busques brillu y direuto, mira escontra’l re.
3. ¿Ye la to primer gaita? Entós simplifica: una gaita en do, d’un constructor solvente, ábrete cuasi toles puertes mientres deprendes. Yá afinarás l’oyíu escontra otres tonalidaes más alantre.

Afinamientu nun ye lo mesmo que tar afináu

Curiáu con un equívocu habitual: una cosa ye la tonalidá na que ta construyida la gaita (do, si bemol, re) y otra ye qu’esa gaita tea bien afinada en cada sesión —que’l punteru y el roncón tean axustaos ente sí y les llingüetes respuendan—. Eso cabero faise cada vez que toques, axustando les cañes. Son dos sentíos distintos de la mesma pallabra y convién nun amestalos.

Una última cosa

La gaita asturiana tien la so propia familia d’afinamientos, distinta de la de los sos parientes de saco. Si vienes entrugándote en qué se diferencia de la so prima del oeste, cuéntolo en gaita asturiana vs gaita gallega: l’afinamientu ye xustamente ún de los puntos onde se separten.

La regla práctica: el meyor afinamientu nun ye’l más guapu n’astrautu, ye’l que te dexa tocar lo que quies tocar, con quien quies tocalo.

Si te entrugues cómo llegamos al temperamentu igual —y qué pasó nel taller d’Alberto Fernández Velasco nos años 80 y 90 pa que eso fuera posible—, cuéntolo en L’evolución del nuesu soníu: cómo la gaita asturiana deprendió a tocar col mundu.

Bibliografía

• Fernández Velasco, Alberto. La gaita asturiana: historia, técnica y repertorio. Caja de Ahorros de Asturias, 1991. La referencia interna más completa sobre l’afinamientu y la construcción del punteru.
• Baines, Anthony. Bagpipes. Oxford: Pitt Rivers Museum, 1960. Contestu comparativu sobre l’afinamientu de les gaites de fuelle europées.